Бриселското обвинителство истражува сомнителни обиди на Мароко да влијае врз белгиските политичари

Обвинителите во Брисел започнаа истрага за сомнителни обиди на Мароко да влијае врз белгиските политичари, објавија локалните медиуми.

Истрагата е започната по извештај на државната телевизија ЕрТеБеЕф, во кој биле презентирани податоци за влијание, мешање и сомневања за корупција на марокански дипломати во белгискиот главен град.

Според телевизијата, постојат индиции дека мароканските претставници се вклучени во активности поврзани со кампањи за лобирање и дезинформации, особено во врска со прашањата за Западна Сахара.

Во последните децении, Рабат се обидува да воспостави контрола во овој регион и бара различни можности за да ги постигне своите цели.

Според извештајот, белгиските политичари се тесно поврзани со Мароко и ја бранат визијата на Рабат за Западна Сахара и други меѓународни прашања.

Се појаснува дека телевизијата ја започнала својата истрага по отворањето на случајот „Катаргејт“ поради сомневање за обиди на Мароко и Катар да влијаат врз одлуките на Европскиот парламент.

Според официјалните статистички податоци од 2020 година, мароканската имигрантска заедница во Белгија е најголема меѓу луѓето со странско потекло во земјата, што сочинува 4,8 отсто од локалното население.

паг/Фото: МИА архива   .

Извор: МИА