Ручекот што францускиот претседател Емануел Макрон му го приреди на својот кинески колега Си Џинпинг во етно ресторанот на идиличниот премин Турмале на Пиринеите во вторникот за малку ќе завршеше со „инцидент“ затоа што на менито за малку ќе се најдеше несреќно именуваната „руска торта“.
Двајцата државници уживале во друштво на своите сопруги во „автентичен, но интимен“ планински ресторан што му припаѓал на пријателот на Макрон, Ерик Абадиер, пишува Фигаро. Се зборувало и за потешки теми, како што е војната во Украина, со која традиционалниот пиринески деликатес изгледа не оди најдобро.
По супата „гарбур“, јагнешкиот бут и други деликатеси, дојде време за сирења и секако десерт. Станува збор за торта со крем од бисквит на база на бадем и пралини, попрскана со шеќер во прав така што наликува на руска степа покриена со снег.
Создадена е во семејна пекара пред околу 100 години, во која се уште се чува таен рецепт, а на поранешниот француски претседател Франсоа Митеран толку многу му се допадна што ја вклучи во менито на Елисејската палата.
Руската торта беше популарна и кај неговите наследници Жак Ширак и Никола Саркози, кои со овој десерт засладуваа многу странски државници. Она што е уште поважно, француските медиуми пренесуваат дека сопругата на претседателот, Брижит Макрон, особено ја сака тортата, но на нејзино разочарување и била послужено „обичен“ тарт од боровинки.
„Пред неколку недели и предложив мени на Елисејската палата“, објаснил сопственикот на ресторанот за весникот La Dépêche du Midi, но морал да направи мала корекција.
Иако на Си веројатно немаше да му пречеше оваа торта со бадем, Фигаро објаснува дека „непријатноста“ била избегната кога се разговарало за тешката тема. Инаку, Кина зазеде неутрален став по прашањето за војната и не ја поддржа експлицитно руската операција, но исто така постојано го осуди мешањето на Западот.
Од друга страна, САД ја обвинуваат Кина дека и испорачува на Русија стратешки важни компоненти за производство на оружје, како што се микрочипови.
