РАНГИРАЊЕ НА МАКЕДОНСКИТЕ КОМПАНИИ СПОРЕД ПРОФИТАБИЛНОСТА – кои се најуспешни, а кои работат со загуба?

Вкупно 90 компании, чии акции котираат на Македонската берза, досега доставија неревидирани годишни финансиски извештаи кои ја отсликуваат нивната финансиска кондиција во 2023 и во 2022 година. Податоците покажуваат дека банкарскиот, фармацевтскиот, телекомуникацискиот и градежниот сектор ја завршија минатата година со најголеми добивки и важат се најуспешни компании во земјава.

Но, според растот на профитабилноста, сликата е доста шарена и покажува дека многу помали компании успеале во 2023 година да постигнат вистински бум во однос на профитите, чиј раст се мери со над 1.000%!

Пари направи анализа на билансот на успех на 90 компании, кои согласно правилата за котација на Македонската берза преку СЕИ-НЕТ ги објавија своите неревидирани неконсолидирани финансиски извештаи за 2023 година.

КОИ КОМПАНИИ ОСТВАРИЛЕ НАЈГОЛЕМА ДОБИВКА ВО 2023 година?

Банкарскиот сектор ги зафаќа првите три позиции. На чело е Комерцијална банка со остварена добивка од 3,6 милијарди денари. Втора е Стопанска банка АД Скопје со вкупна добивка од 3,5 милијарди денари, а на третото место е НЛБ банка со вкупен профит во 2023 година од 3,2 милијарди денари.

После банките следува Македонски телеком со остварена добивка од 2,1 милијарда денари. На петтата позиција е Алкалоид со профит од 1,52 милијарди денари, а веднаш зад него е Цементарница Усје со за нијанса помала добивка, која изнесува 1,51 милијарда долари. И со неа завршува „клубот на милијардери“.

Рангирање на компании според висина на добивка во 2023 година

*Извор: Македонска берза АД Скопје

Следуваат 57 компании чии профити се мерат во милиони денари. Предводник е Макпетрол со добивка од 935,7 милиони денари. Следуваат Мермерен комбинат АД Прилеп, ЗК Пелагонија АД Битола, УНИ банка, Гранит, Макстил, Винарска визба Тиквеш, Оилко, Окта, Прилепска пиварница, Тутунски комбинат Прилеп,  Реплек, Пекабеско, Фершпед и ТТК банка, чија добивка во минатата година е над 100 милиони денари.

На оваа листа има и 20 компании кои минатата година ја завршиле со загуба. Меѓу нив се и Интернешнелс хотелс АД Скопје, РЖ Услуги, ГТЦ АД Скопје, ФЗЦ 11 Октомври Куманово…

Интересно е дека рангирањето на профитите остварени во 2022 година дава поразличен распоред. Тогаш првото место и припаѓа на НЛБ банка со добивка од 2,43 милијарди денари, втора била Стопанска банка Скопје со 2,37 милијарди денари, а трета Комерцијална банка со 2,1 милијарда денари. По банките, повторно се Македонски телеком и Алкалоид, а тука е и Макпетрол, кој во 2022 година имал подобри финансиски резултати отколку во 2023.

КОИ КОМПАНИИ ИМААТ НАЈГОЛЕМ РАСТ НА ПРОФИТОТ? 

Не се тоа ниту банките, ниту телекомуникациските или фармацевтските компании. Убедливо најголем раст на профитот во 2023 година има струмичката компанија Нова стоковна куќа од дури 1.717%. Оваа компанија ја зголемила добивката од 877.000 денари на 15,9 милиони денари. На второто место е земјоделскиот комбинат Пелагонија од Битола со раст на добивката од 1.198%. Битолскиот комбинат во 2022 година има добивка од 38,8 милиони денари, а веќе следната година ја зголемува на 504,1 милион денари. На третото место, исто така со раст на профитот мерен во 1.029%, е РЖ Техничка контрола Скопје. Во 2022 година оваа компанија има добивка од 2,3 милиони денари, а во 2023 година дури 25,7 милиони денари.

И хотелиерите можат да се пофалат со многу успешна година. Хотели Метропол имаат раст на профитот од 364%, а Македонија турист од 212%. Во ова друштво се и Гранит, Витаминка, Реплек и Прилепската пиварница, чиј раст на профит е над 100%.

*Извор: Македонска берза АД Скопје

Но, 2023 година не била поуспешна од 2022 година за повеќето компании имајќи предвид дека дури 47 од нив имаат пад на профитабилноста. Меѓу нив се Мермерен комбинат Прилеп, Европа, Макпетрол, Окта, Пелистерка, Макстил и други.

Редакција Пари

Преземањето на авторски содржини (текстови и фотографии) од оваа страница е дозволено само делумно и важат условите опишани на следниот линк.