Кинезите слават камионџија кој го паркирал возилото преку автопатот и на тој начин спречил повеќе возила да се тркалаат по падината по уривањето на автопатот. Најмалку 48 лица загинаа во несреќата на југот на земјата.
Ванг Ксијангнан во средата возел по автопат во провинцијата Гуангдонг кога забележал неколку возила кои се движат во спротивна насока од патот со четири ленти. Набрзо еден колега возач го известил дека автопатот пропаднал. Реагирајќи брзо, поранешниот војник Ванг го позиционираше својот камион да го блокира автопатот, запирајќи десетици возила да се движат понатаму. Во меѓувреме, неговата сопруга излегла од камионот за да ги предупреди другите возачи за ситуацијата, пренесуваат кинеските медиуми, а пренесува Index.hr.
Доби парични награди
„Не размислував премногу. Само сакав да ги запрам возилата“, изјави Ванг за еден кинески медиум. Храбрите постапки на Ванг не само што добија пофалби од Кинезите на социјалните мрежи, туку и признанија од Здружението за развој на работниците во Кина.
Здружението во петокот објави дека на Ванг му доделило 10.000 јуани (1.414 долари) во соработка со автомобилска компанија. Добротворниот проект поврзан со технолошкиот гигант Алибаба, исто така, му даде на Ванг еднаков износ. Ванг изјави за весникот дека парите ќе ги донира на семејствата на жртвите од колапсот.
Локалните медиуми, исто така, објавија дека уште еден маж клекнал за да ги спречи автомобилите да продолжат по автопатот.
Несреќата се случила по еден месец обилни дождови во Гуангдонг. Некои од 23-те возила кои втурнаа во длабоката провалија се запалија, по што се издигнаа густи облаци од чад.
Во саботата, градската влада на Меиџоу во Гуангдонг објави дека властите ќе спроведат проверки на автопатите, железниците и патиштата во планинските области. Тим предводен од гувернерот на провинцијата ги истражува причините за падот.
