Членовите на НАТО се „длабоко загрижени“ од неодамнешните хибридни напади врз Чешка, Естонија, Германија, Летонија, Литванија, Полска и Обединетото Кралство кои и се припишуваат на Русија, соопшти одбранбената алијанса.
„Овие инциденти се дел од засилената кампања на активности што Русија продолжува да ги спроведува низ евроатлантската област, вклучително и на териториите на земјите-членки преку посредници“, се вели во соопштението.
Во последниве недели, европските безбедносни служби открија серија активности што ги нарекоа руска шпионажа, вклучително и шпионска мрежа зад онлајн медиумска куќа која беше откриена од чешки истражители, што ги поттикна властите во други земји да спроведат истраги.
Европските медиуми објавија и дека член на екстремно десничарската Алтернатива за Германија (AfD) наводно добил средства од проруски медиум, што политичарот го одбил.
Членките на НАТО најавија „континуирано зајакнување“ на отпорот против таквите напади и рекоа дека ќе применат алатки за „спротивставување и оневозможување на руската хибридна акција“.
„Руските акции нема да ги одвратат сојузниците да продолжат да ја поддржуваат Украина“, соопшти НАТО.