САД ја обвинија Русија за употреба на хемиско оружје на бојното поле во Украина и за кршење на меѓународните закони кои ја забрануваат неговата употреба, јавува Би-би-си.
Претставници на Стејт департментот изјавија дека Русија го користела асфиксирачкиот хлорпикрин за да добие предност на бојното поле во Украина.
Наводите, за кои американски официјални лица рекоа дека не се „изолиран“ инцидент, ја прекршуваат Конвенцијата за хемиско оружје (CWC), чиј потписник е Русија.
Кремљ: Американските обвинувања се неосновани
Кремљ ги отфрли обвинувањата, нарекувајќи ги „неосновани“. Портпаролот на Кремљ, Дмитриј Песков, изјави за новинарите во Москва дека Русија останува на своите обврски од CVC, која им забранува на државите да развиваат или набавуваат хемиско оружје. Околу 193 земји ја ратификуваа конвенцијата.
Организацијата за забрана на хемиско оружје (OPCW), глобален регулатор кој го надгледува спроведувањето на CVC, вели дека хемиското оружје е супстанца што се користи за намерно да предизвика смрт или повреда поради неговите токсични својства.
Што е хлорпикрин?
Хлорпикрин, за кој САД велат дека го користела Русија за да ги истисне украинските сили од зацврстените позиции, е супстанца на база на нафта која широко се користела за време на Првата светска војна.
Предизвикува иритација на белите дробови, очите и кожата и може да предизвика повраќање, гадење и дијареа, според американскиот Центар за контрола на болести (ЦДЦ).
Употребата на хемикалија во војување е изрично забранета со CVC и наведена од OPCV како асфиксија. Стејт департментот соопшти и дека Москва за време на војната редовно користела „агенти за контрола на немири“ или солзавец, пишува Би-би-си.
Бајден претходно вети дека Путин ќе плати висока цена доколку навистина одобри употреба на хемиско оружје
Американскиот претседател Џо Бајден претходно ја предупреди Русија да не користи хемиско оружје во Украина.
Во март 2022 година, неколку недели откако Москва ја започна инвазијата, Бајден вети дека рускиот претседател Владимир Путин ќе плати висока цена доколку одобри употреба на хемиско оружје.
„Ние би одговориле доколку тој го искористи. Природата на одговорот ќе зависи од природата на употребата“, рече Бајден.
