Според израелските новинари по тајната посета на џамија во Малме, како што објавија британските медиуми, исламските екстремисти наводно „планираат да го бомбардираат“ Евросонг во Шведска поради учеството на Израел следната недела.
Според „Дејли мејл“, исламските екстремисти планираат следната недела да го бомбардираат местото на Евровизија во Шведска во знак на протест поради учеството на Израел.
Тајните новинари на еден израелски информативен канал рекоа дека стражарите во најголемата џамија во Малме – градот во кој се одржува настанот – им кажале дека терористите планирале да ја нападнат арената каде што ќе се одржи петдневниот натпревар.
Претставувајќи се како муслимански британски туристи, новинарите тврдат дека биле предупредени од обезбедувањето да не присуствуваат на настанот.
Израелскиот ТВ канал Кешет 12 снимениот разговор го пријавил на организаторите на настанот, како и на шведската полиција, која сега го истражува случајот.
Пропалестинските активисти ја повикаа Евровизија да му забрани на Израел да учествува на натпреварот поради војната во Газа, за која Хамас вели дека има повеќе од 32.000 мртви, од кои повеќето жени и деца.
Еден Голан, руско-израелски пејач, ќе го претставува Израел на Евровизија.
Евровизија претходно ја забрани Русија откако таа ја нападна Украина во февруари 2022 година, но му дозволува на Израел да се натпреварува оваа година и покрај тоа што песната на Голан предизвика контроверзии, дури и пред почетокот на овогодинешниот натпревар.