Турската полиција денеска ја затвори областа околу плоштадот Таксим во Истанбул за да спречи каков било собир на Меѓународниот ден на трудот, 1 мај, бидејќи местото беше епицентар на бранот протести против претседателот Реџеп Таип Ердоган во 2013 година.
Околу плоштадот се поставени високи метални бариери, пренесе агенцијата Франс прес.
Повеќе од 42.000 полицајци утре ќе бидат распоредени во Истанбул, изјави турскиот министер за внатрешни работи Али Јерликаја.
Нема да дозволиме терористичките организации да создадат поле за дејствување и пропаганда од 1 мај“, додаде министерот.
Собирите на плоштадот Таксим не се дозволени веќе неколку години, но синдикатите и политичките организации редовно ги повикуваат своите членови да се соберат таму.
Неколку од нив повикаа утре да организираат марш во правец на плоштадот.
Плоштадот Таксим и соседниот парк Гези, лоциран на европската страна на Истанбул, беа во центарот на бранот демонстрации во 2013 година против владата на Реџеп Таип Ердоган, тогашен премиер од 2003 година.
Партијата на правдата и развојот (АКП) на Ердоган беше поразена на локалните избори на 31 март. Тоа беше нејзиниот најголем неуспех во текот на нејзините две децении на власт.
Истанбул, важен град и економски главен град на земјата, остана во рацете на Републиканската народна партија, главната опозициска партија во Турција.
