Земјотрес со јачина од 6,5 степени според Рихтеровата скала денеска го погоди брегот на индонезискиот остров Јава, соопшти локалната агенција за геофизика.
Земјотресот е почувствуван и во Џакарта, каде се евакуирани некои згради, како и во близина на градот Бандунг.
Не е издадено предупредување за цунами, додека Геолошкиот институт на САД (USGS) соопшти дека земјотресот бил на длабочина од 68,3 километри.
Индонезија, архипелаг од 17.000 помали и поголеми острови, се наоѓа на спојот на три големи тектонски плочи. Таа земја се наоѓа на огнениот прстен на Пацификот, каде има голема вулканска активност и чести се силни земјотреси.
Во Индонезија, 170.000 луѓе загинаа во големиот земјотрес и цунами во 2004 година.
