Неколку воени коњи, меѓу кои и еден крвав, се тркаа низ улиците на центарот на Лондон, при што беа повредени најмалку четири лица, јавува Ројтерс.
Бизарни сцени се случија во срцето на Лондон, во близина на Бакингемската палата и седиштето на британската влада, со побегнати животни кои галопираа покрај збунетите граѓани, пренесува Ројтерс.
„Голем број воени работни коњи се откачија за време на рутинска вежба утринава. Сите коњи сега се заробени и вратени во кампот“, се вели во соопштението на портпаролот на британската армија.
„Голем број на членови на персоналот и коњи се повредени и им е потребна соодветна медицинска помош“, се додава во соопштението.
Медицинските власти соопштија дека четири лица биле пренесени во болница откако биле повредени.
Би-би-си објави дека четворица војници биле исфрлени од нивните коњи, а еден од преплашените коњи се судрил со автомобил.
Телевизиските снимки покажаа еден оседлан бел коњ, наизглед облеан во крв, како трча по улицата заедно со друг црн коњ.
Коњите припаѓаат на домашната коњаница, која делува како официјален телохранител на британскиот монарх и учествува во церемонијалните должности. Тие се сместени во касарна во Хајд Парк, на помалку од два километри од Бакингемската палата.