ВИДЕО: Јувентус е првиот финалист во Купот на Италија
По првиот натпревар во Торино екипата на Јувентус имаше позитива од 2:0, а на реваншот од полуфиналето во фудбалскиот Куп на Италија составот на Лацио беше подобар во Рим со 2:1.
„Небесно-сините“ успеаја да постигнат два гола преку Кастељанос во 12 и 49 минута и така ги вратија шансите во овој двомеч.
Но, во самиот финиш од мечот поточно во 83 минута Јуве дојде до гол кој го реализираше Милик и го однесе тимот во големото финале.
Противник на „Старата дама“ во борбата за пехарот ќе биде победникот од втората полуфинална пресметка која е закажана за в среда помеѓу Аталанта и Фиорентина во Бергамо. По првите 90 минути Фиорентина обезбеди предност во Фиренца од 1:0.
Потсетување дека финалето во ова куп натпреварување ќе се игра на 15 мај на стадионот „Олимпико“ во Рим.
Јувентус е најтрофеен во Купот на Италија со 14 титули, последната ја имаше во 2021 година кога во Реџо Емилија ја совлада Аталанта. Беше и финалист и во 2022 година, но тогаш клубот од Торино на „Олимпико“ загуби од Интер.