Портпаролот на вооружените бригади Ал Касам на Хамас, Абу Обеида, повика на ескалација на сите фронтови во неговиот говор на ТВ, по повод 200 дена од почетокот на војната во Газа предизвикана од нападот на терористичката група на 7 октомври.
Во видеото емитувано од телевизијата Ал Џезира, Абу Обеида го фали нападот на Иран врз Израел на 13 април, велејќи дека употребата на експлозивни беспилотни летала и балистички ракети „постави нови правила, повлече важни равенки и го збуни непријателот и оние што стојат зад него“.
Тој, исто така, повика на ескалација на Западниот брег и Јордан, нарекувајќи го „еден од најважните арапски фронтови“.
Јордан, кој се наоѓа меѓу Иран и Израел, беше една од земјите вклучени во пресретнувањето и соборувањето на иранските беспилотни летала кои се упатија кон Израел.
„Го повикуваме јорданскиот народ да ги засили своите акции и да го крене својот глас“, рече Абу Обеида.
Тој вели дека Хамас останува на своите барања во тековните разговори – Израел да ја прекине воената офанзива, да ги повлече силите од Газа, да им дозволи на раселените да се вратат во северна Газа и да ја укине блокадата.
„Израелската Влада прави застој во постигнувањето договор за размена на заложници и се обидува да ги попречи напорите на посредниците да постигнат договор за прекин на огнот“, рече Абу Обеида.
Портпаролот на американскиот Стејт департмент, Метју Милер, вчера изјави дека Хамас ја „помести целта“ и ги промени своите барања во преговорите за заложниците.
Катар и Египет се обидуваат да посредуваат во договор за примирје и за заложниците, но портпаролот на катарското Министерство за надворешни работи претходно во вторникот рече дека сите засегнати страни треба да „покажат сериозност“ и да дозволат таквите напори да успеат.
