Австралијката во текот на постот ја исфрлила целата храна од исхраната и консумирала само домашен сок. Таа е одушевена од ефектите коишто тој ритуал ги предизвикал во нејзиното тело, но сепак, тоа не е препорачливо за секого.

Ен Озборн од Квинсленд, Австралија, рекла дека пиела сок од портокал 40 дена без прекин и никогаш не се чувствувала поздрава, пишува „УСА тудеј“.

Озборн, која на Инстаграм има профил под називот @fruitisbeaut, на својата страница објавува содржина за своето искуство со фрутаријанство, исхрана што се состои само од овошје.

– Тоа беше прекрасно искуство. Почувствував емоционални, физички и духовни придобивки – им рекла Озборн на своите следбеници на Инстаграм за нејзиното 40-дневно чистење со сок од портокал, што го направила во текот на постот.

Во коментарите изјавила дека користи стар соковник од 1966 година.

Дневно пиела од литар до литар ипол и тоа било сè.

– Ти си мојата инспирација, и јас имав 40 дена пост на сокови, одушевена сум од придобивките – изјавила една следбеничка во коментарите.

Експертите се согласуваат дека сокот од портокал има здравствени придобивки и дека е богат со витамин Ц, кој е одличен за имунолошкиот систем, срцето и го поттикнува производството на колаген.

Тоа е и антиоксидант кој ги штити клетките од слободните радикали, истакнуваат од клиниката Мејо. Бидејќи телото не произведува витамин Ц по природен пат, луѓето мора да го внесуваат преку исхраната, но, и покрај здравствените придобивки, мора да се внимава, бидејќи може и да се претера со неговото внесување.

Земањето 2.000 мг или повеќе витамин Ц може да предизвика здравствени проблеми како што се камења во бубрезите или гастроинтестинални нарушувања, објави болницата „Маунт Синаи“.

Озборн вели дека понекогаш пие 5 литри сок од портокал дневно, што е околу 2620,6 мг. Пиењето сок, кој може да содржи многу шеќер, исто така, нема толку корист како јадењето цело овошје.

– Соковите обично немаат влакна, а влакната се тие кои помагаат да се забави апсорпцијата на шеќерот и да се намали гликемискиот индекс – рекла регистрираната диететичарка Аби Шарп за „УСА тудеј“.

– Значи, сокот од портокал, дури и кога не е засладен, може да предизвика скокови на шеќерот во крвта – рекла Шарп, а пренесува „Њујорк пост“.