Би можеле да достигнат цена од 400.000 долари: Култните фустани на принцезата Дијана ставени на аукција
Жолто палто со темно сина јака и блескави златни копчиња, кое принцезата Дијана го носеше на патување во Хонг Конг во 1989 година, ќе биде една од шесте нејзини парчиња облека изложени во поранешната британска колонија пред аукцијата. закажана за јуни.
Колекцијата на фустани, чевли и чанти на принцезата од Велс ќе биде изложена во трговскиот центар во Хонг Конг во следните 12 дена од четврток, а потоа колекцијата ќе биде преместена во Ирска, каде ќе биде изложена до аукцијата на 27 јуни.
„Принцезата Дијана ја диктираше модата секогаш кога се облекуваше и излегуваше“, рече Мартин Нолан, директор на аукциската куќа „Џулиенс“ со седиште во Калифорнија.
Познатото жолто палто на дизајнерката Кетрин Вокер би можело да достигне цена од 50.000 долари, додека синиот вечерен фустан со ѕвездички би можел да достигне цена од 400.000 долари. Принцезата го носеше овој фустан од дизајнерот Мареј Арбејд на премиерата на „Фантомот на операта“ („The Phantom of the Opera“) во 1986 година во Вест Енд, Лондон.
Изложена е и свилена вечерна тоалета од дизајнерот Виктор Еделштајн и цветна тоалета на Кетрин Вокер што принцезата ја носеше во 1991 година.
Еден од посетителите на изложбата, 69-годишниот Фунг, се сеќава како толпата се насобрала низ улиците на Хонг Конг кога принцезата Дијана пристигнала во тој град во 1989 година.
„Таа беше харизматична, грижлива и посветена на добротворната работа. Затоа е исклучително почитувана во Хонг Конг“, вели Фунг.
Во 2023 година, аукциската куќа „Џулиенс“ продаде вечерен фустан на принцезата Дијана за рекордни 1,14 милиони долари.