Режисерот, сценарист и продуцент Џорџ Лукас е новиот лауреат на почесната Златна палма за животно дело на Филмскиот фестивал во Кан, а ова признание ќе му биде врачено на 25 мај на затворањето на фестивалот.

Холивудскиот режисер, кој во мај ќе наполни 80 години, на тој начин влегува во друштвото на одбрани лауреати, а пред него наградата за животно дело ја добија и Харисон Форд, Мајкл Даглас, Том Круз, Џоди Фостер, се наведува на веб-страницата на Канскиот фестивал.

Филмскиот фестивал во Кан вели дека со задоволство оддава почит на една од најголемите личности во современата кинематографија, човек со извонредна кариера, која спојува одлична забава и иновации, митологија и модерна технологија. По повод оваа значајна награда, Лукас истакна дека фестивалот во Кан отсекогаш имал специјално место во неговото срце.

– Бев изненаден кога мојот прв филм „THX-1138“ беше избран да биде прикажан во тогашната нова програма посветена на режисерите. Оттогаш, се вратив на фестивалот во различни улоги како писател – сценарист, режисер или продуцент. Навистина сум почестен од ова посебно признание, кое многу ми значи – изјавил Лукас, пренесува Танјуг.

Филмскиот фестивал во Кан започнува на 14 мај, а ќе го отвори филмот на Квентин Дупуј „Вториот чин“ (The Second Act), додека публиката ќе има можност да го погледне и долгоочекуваниот филм „Мегалополис“ (Megalopolis) на Френсис Форд Копола, одличен режисер чиј кариерата е исто така поврзана со почетоците на Лукас.